Ingerlariaqqiffiusumik ilinniarfinni naammassinnittarnerit
Saqqummersitami uani ilinniartut ilinniakkamik aallartitsinermiit ukiut 1-10 qaangiunnerini ilinniarnermi killiffii saqqummersinneqarput. Ilinniartut ilinniakkaminnik naammassinnissimasut ilinniakkap aallartinneraniit ukiut quliut tungaannut qaangiunnerini agguaqatigiissillugu naammassisarnermut procentiat tabelinit naatsorsorneqarsinnaavoq.
Tabelini ilinniarnermi killiffiit naatsorsukkat tassaapput:
· Ilinniakkami pineqartumi aallartinneqarsimasumi killiffik.
· Ilinniakkap qaffasissusaani aallartinneqarsimasumi killiffik.
Tabelimi kingullermi ilinniartut ilinniakkap qaffasissusaani ataatsimi ilinniakkap sammivianik allanngortitsisut sillimaffigineqarput.
Saqqummersitami ingerlariaqqiffiusumik ilinniakkat kisimik pineqarput. Inuusuttunut ilinniarfinni naammassinnittarnerit pillugit saqqummersitaq www.stat.gl –imi takuneqarsinnaavoq.
Ilinniakkamik aallartissimasamik naammassinnittarneq
Ingerlariaqqiffiusumik ilinniarfiit ilinniakkanik naatsunik nalinginnaasumik ukiunik marlunnik sivisussusilerneqarsimasunik, ilisimatusarluni bachelorinngorniarnernik ukiunik pingasunik sivisussusilerneqarsimasunik, professionsbachelorinngorniarnernik ukiunik 3,5-4-inik sivisussusilerneqarsimasunik kandidatinngorniarnernillu ukiunik marlunnik sivisussusilerneqarsimasunik imaqarput.
2018-imi 145-t sivikitsumik ilinniaqqinniarlutik aallartissimasut akornanni 60-it ukiut sisamat ingerlaneranni ilinniarnertik naammassisimavaat. Ilinniarlutik aallartissimasut 41 pct.-it ukiut marluk ilinniarnerup sivisussusissaa eqqorlugu naammassisimapput.
2017-imiit ilisimatusarluni bachelorinngorniat naammassinnittarnermut procentiat ingerlariaqqiffiusumik ilinniakkat akornanni appasinnerpaavoq. Aallartitsinermit ukiut pingasut qaangiunnerini 23 pct.-iisa ilinniagaq aallartissimasartik naammassisimavaat. Ukiullu tallimat qaangiunnerini 34 pct.-iisa ilinniagartik naammassisimallugu.
2016-imi professionsbachelorinngorniarlutik ilinniakkamik aallartissimasut 37 pct.-iisa ukiut sisamat qaangiunnerini, ilinniarnerup sivisussusissaa eqqorlugu, ilinniagaq aallartissimasartik naammassisimavaat. Ukiullu marluk qaangiuteqqinnerini 45 pct.-innngorsimapput.
2018-imi kandidatinngorniarlutik ilinniakkamik aallartitsisimasut 30 pct.-it ilinniakkap sivisussusilerneqarnera malillugu ilinniakkaminnik naammassinnissimapput, ukiulli sisamat ingerlanerini 59 pct.-iisa naammassinnissimallutik.
Titartagaq 1. Ingerlariaqqiffiusumik ilinniarfinni naammassinnittarnermut procenti, 2016-imi, 2017-imi 2018-imilu aallartittut malillugit
Nalunaarut: Naammassinnittarnermut procenti ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq; Ingerlariaqqiffiusumik ilinniakkat naatsut (2018), bachelorinngorniarnerit (2017), professionsbacheloringorniarnerit (2016), kandidatinngorniarnerit (2018). Ilinniakkat sivisussusilerneqarneri ukioq kaajallallugu naatsorsorneqarput.
Najoqqutaq: Naatsorsueqqissaartarfik- kisitsisaataasivimmi kisitsisit takukkit (https://bank.stat.gl/UDNISC11L).
Arnat angutinit amerlanerusut ilinniakkamik naammassinnissimapput
Arnat angutinit amerlanerusut ingerlariaqqiffiusumik ilinniarfimmik aallartitsisarput. Taamatuttaaq arnat amerlanerusut naammassisarput.
2018-imi ingerlaqqiffiusumik naatsumik ilinniartut ilinniarfinni aallartissimasut akornanni, arnat angutillu aallartissimasut akornanni ukiut sisamat ingerlaneranni arnat akornanni naammassisimasut 55 pct.-iusimapput angutit akornanni naammassisimasut 50 pct.-iusut.
Akademiskiusumik bachelorinngorniartut naammassinnittarnermut kisitsisaanni arnat amerlanerusimapput, 2017-imi aallartissimasut eqqarsaatigissagaanni. Taakkunani arnat 33 pct.-ii angutillu 37 pct.-ii naammassisimapput.
Titartagaq 2. Ingerlariaqqiffiusumik ilinniarfinni ukiunik marlunnik sivisunerusumillu sivisussuseqartuni naammassinnittarnermut procenti, 2016-imi, 2017-imi 2018-imilu aallartittut suiaassusaat malillugu
Nalunaarut: Naammassinnittarnermut procenti ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq; Ingerlariaqqiffiusumik ilinniakkat naatsut (2018), bachelorinngorniarnerit (2017), professionsbacheloringorniarnerit (2016), kandidatinngorniarnerit (2018). Ilinniakkat sivisussusilerneqarneri ukioq kaajallallugu naatsorsorneqarput.
Najoqqutaq: Naatsorsueqqissaartarfik- kisitsisaataasivimmi kisitsisit takukkit (https://bank.stat.gl/UDNISC11).
Nunani assigiinngitsuni naammassisartut
Professionsbacheloritut aamma kandidatitut ilinniartut akornanni nunat ilinniarfigisimasat sanilliunnerini assigiinngissutsit ersarinnerupput. Kalaallit Nunaanni ingerlariaqqiffiusumik ilinniakkani naatsuni professionsbachelorinngorniarnernilu ilinniartut 52 pct.-it 53 pct.-illu naammassisimasut Kalaallit Nunaata avataani ilinniartut 53 pct.-ii 31 pct.-iilu naammassisimapput. Kalaallit Nunaata avataani kandidatinngorniartut naammassisartut amerlanerupput, Kalaallit Nunaata avataani ilinniartut 68 pct.-ii naammassinnissimasut Kalaallit Nunaanni ilinniartut 47 pct.-ii naammassisimasut.
Titartagaq 3. Ingerlariaqqiffiusumik ilinniarfinni ukiunik marlunnik sivisunerusumillu sivisussuseqartuni naammassinnittarnermut procenti, 2016-imi, 2017-imi 2018-imilu aallartittut nuna ilinniarfiat malillugu
Nalunaarut: Naammassinnittarnermut procenti ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq; Ingerlariaqqiffiusumik ilinniakkat naatsut (2018), bachelorinngorniarnerit (2017), professionsbacheloringorniarnerit (2016), kandidatinngorniarnerit (2018). Ilinniakkat sivisussusilerneqarneri ukioq kaajallallugu naatsorsorneqarput.
Najoqqutaq: Naatsorsueqqissaartarfik- kisitsisaataasivimmi kisitsisit takukkit (https://bank.stat.gl/UDNISC11L).
Ilinniakkap qaffasissusaanik aallartissimasamik
naammassinnittarneq
Ilinniartut ilaat ilinniagaq aallartissimasartik unitsillugu allamik ilinniakkamik naammassinnittarput. 2015-imi siullermeerlutik ingerlariaqqiffiusumik ilinniakkamik aallartitsisimasut 49 pct.-ii ukiut arfineq-marluk ingerlanerini ingerlariaqqiffiusumik ilinniakkamik naammassinnissimapput. Taakkunannga 13 pct.-it ilinniakkap qaffasissusaani aallartissimasaraluaminnit allaanerusumi ilinniakkamik naammassinnissimapput. Pingaartumik ilisimatusarluni bachelorinngorniarnerninngaanneersut amerlasuut unitsitsisarput sammivimmillu allamik aallartitsillutik, soorlu professionsbachelorinngorniarnernik imaluunniit ingerlariaqqiffiusumik ilinniarnernik naatsunik. 2015-imi bachelorinngorniarlutik aallartissimasut 29 pct.-iisa ukiut arfineq-marluk ingerlanerini ilinniagartik naammassisimavaat, 29 pct.-illi ingerlariaqqiffiusumik ilinniarfimmik allamik qaffasissusilimmik naammassinnissimallutik.
Titartagaq 4. Ingerlariaqqiffiusumik ilinniarfimmi aallartinnermiit ukiut arfineq-marluk qaangiunnerini ilinniakkap killiffia, 2015-imi aallartittut malillugit
*Ingerlariaqqiffiusumik ilinniakkani ilinniakkap qaffasissusaanik allamik naammassinnissimasut.
Nalunaarut: Ilinniakkap killiffia ukiup naanerani ilinniartunut 2015-imi inuusuttunut ilinniarfimmik siullermeerlutik aallartitsisimasunut naatsorsorneqarpoq.
Najoqqutaq: Naatsorsueqqissaartarfik – kisitsisaataasivimmi kisitsisit takukkit (https://bank.stat.gl/UDNISC11O).